തിരുവനന്തപുരം: സംസ്ഥാന സർക്കാരിന്റെ നൂറുദിന കർമപദ്ധതിയുടെ ഭാഗമായി 5,183 പ്രൈമറി സ്കൂളുകളിൽ ‘ഡിജിറ്റൽ സ്‌ക്വയർ’ പദ്ധതി നടപ്പാക്കും. പൊതുവായ ഡിജിറ്റൽ പഠന ഇടം ഒരുക്കുകയും കുറഞ്ഞത് രണ്ട് കമ്പ്യൂട്ടറുകൾ പ്രവർത്തനസജ്ജമാക്കുകയും ചെയ്ത സ്കൂളുകളെയാണ് ആദ്യഘട്ടത്തിൽ പദ്ധതിക്കായി തെരഞ്ഞെടുത്തത്.

പദ്ധതിയിൽ ഉൾപ്പെട്ട സ്കൂളുകളുടെ പട്ടിക കേരള ഇൻഫ്രാസ്ട്രക്ചർ ആൻഡ് ടെക്നോളജി ഫോർ എഡ്യൂക്കേഷന്റെ (കൈറ്റ്) വെബ്സൈറ്റിൽ പ്രസിദ്ധീകരിച്ചിട്ടുണ്ട്. സെപ്റ്റംബർ ആദ്യവാരം പദ്ധതിയിൽ ഉൾപ്പെട്ട സ്കൂളുകളിലെ കമ്പ്യൂട്ടറുകളിൽ ആവശ്യമായ സോഫ്റ്റ്‌വെയർ പാക്കേജ് കൈറ്റ് ലഭ്യമാക്കും. തുടർന്ന് ഡിജിറ്റൽ സ്‌ക്വയറിന്റെ ചുമതലയുള്ള അധ്യാപകർക്ക് പ്രത്യേക പരിശീലനവും നൽകും.

കൈറ്റ് സജ്ജമാക്കിയ സ്വതന്ത്ര സോഫ്റ്റ്‌വെയർ അധിഷ്ഠിത പ്ലാറ്റ്‌ഫോമിലൂടെ എല്ലാ കുട്ടികൾക്കും ഒരുപോലെ ഡിജിറ്റൽ പഠനസൗകര്യം ലഭ്യമാക്കുകയാണ് പദ്ധതിയുടെ ലക്ഷ്യം. ഡിജിറ്റൽ സാങ്കേതികവിദ്യ അധിഷ്ഠിത പഠനം കൂടുതൽ കാര്യക്ഷമവും രസകരവുമാക്കുന്നതിനൊപ്പം കളിയിലൂടെയുള്ള പഠനം, സർഗാത്മകത, സ്വയംപഠനശേഷി, ഡിജിറ്റൽ സാക്ഷരത എന്നിവ വളർത്താനും പദ്ധതി ലക്ഷ്യമിടുന്നു.

പ്രൈമറി വിഭാഗത്തിലെ ‘കളിപ്പെട്ടി’, ‘ഇ@വിദ്യ’ എന്നീ ഐ.സി.ടി. പാഠപുസ്തകങ്ങളിലൂടെ മറ്റു വിഷയങ്ങളുടെ പഠനം കൂടുതൽ ഫലപ്രദമാക്കാനും സൗകര്യമൊരുക്കും. കാഴ്ചപരിമിതിയുള്ളവർക്കും പ്രത്യേക പരിഗണന അർഹിക്കുന്ന കുട്ടികൾക്കും ഉപയോഗിക്കാവുന്ന തരത്തിലാണ് പ്ലാറ്റ്‌ഫോം രൂപകൽപ്പന ചെയ്തിരിക്കുന്നത്.

ആദ്യഘട്ടത്തിൽ സന്നദ്ധത അറിയിച്ച സ്കൂളുകളെയാണ് പരിഗണിച്ചത്. 814 സ്കൂളുകളുമായി മലപ്പുറം ജില്ലയാണ് മുന്നിൽ. എറണാകുളം 475, പാലക്കാട് 466, കണ്ണൂർ 463 എന്നിങ്ങനെയാണ് തൊട്ടുപിന്നിൽ.

നൂറുദിന കർമപദ്ധതിയുടെ ഭാഗമായി 5,000 പ്രൈമറി സ്കൂളുകളിലായിരുന്നു പദ്ധതി ലക്ഷ്യമിട്ടിരുന്നത്. ലക്ഷ്യത്തേക്കാൾ കൂടുതൽ സ്കൂളുകളെ ആദ്യഘട്ടത്തിൽ ഉൾപ്പെടുത്തിയിട്ടുണ്ട്. ഈ വർഷം തന്നെ സംസ്ഥാനത്തെ മുഴുവൻ പ്രൈമറി സ്കൂളുകളിലേക്കും പദ്ധതി വ്യാപിപ്പിക്കാനാണ് അടുത്തഘട്ടത്തിൽ ലക്ഷ്യമിടുന്നത്.

English Summary:

The Kerala government has selected 5,183 primary schools for the ‘Digital Square’ project under its 100-day action programme. The initiative will provide a common digital learning space, software and teacher training, with the aim of strengthening digital literacy, creativity, self-learning and technology-based education among primary school students.