ന്യൂഡൽഹി: 2026ലെ സി.ബി.എസ്.ഇ പ്ലസ് ടു സപ്ലിമെന്ററി പരീക്ഷയുടെ പുനർമൂല്യനിർണയ, മാർക്ക് പരിശോധന നടപടികൾക്ക് തുടക്കമായി. മാർക്കിൽ തൃപ്തരല്ലാത്ത വിദ്യാർഥികൾക്ക് ആദ്യം മൂല്യനിർണയം നടത്തിയ ഉത്തരക്കടലാസിന്റെ സ്കാൻഡ് കോപ്പിക്ക് അപേക്ഷിക്കാം.

ഓഗസ്റ്റ് 31, സെപ്റ്റംബർ 1 തീയതികളിലാണ് സ്കാൻഡ് കോപ്പിക്കായി അപേക്ഷിക്കേണ്ടത്. ഒരു വിഷയത്തിന് 100 രൂപയാണ് ഫീസ്. സ്കാൻഡ് കോപ്പി ലഭിച്ചശേഷം മാത്രമേ മാർക്ക് പരിശോധനയ്ക്കും പുനർമൂല്യനിർണയത്തിനും അപേക്ഷിക്കാനാകൂ.

മാർക്ക് പരിശോധനയ്ക്കും പുനർമൂല്യനിർണയത്തിനും സെപ്റ്റംബർ 7, 8 തീയതികളിലാണ് അപേക്ഷിക്കേണ്ടത്. മാർക്ക് പരിശോധനയ്ക്ക് ഒരു ഉത്തരക്കടലാസിന് 100 രൂപയും പുനർമൂല്യനിർണയത്തിന് ഓരോ ചോദ്യത്തിനും 100 രൂപയുമാണ് ഫീസ്.

പുനർമൂല്യനിർണയം തിയറി വിഭാഗത്തിലെ മുഴുവൻ ചോദ്യത്തിനുമാണ് നടത്തുക. പുനർമൂല്യനിർണയത്തിൽ മാർക്ക് കൂടാനും കുറയാനും സാധ്യതയുണ്ടെന്നും സി.ബി.എസ്.ഇ വ്യക്തമാക്കി. ലഭിക്കുന്ന ഫലം അന്തിമമായിരിക്കും; തുടർന്ന് അപ്പീലിനോ പുനഃപരിശോധനയ്ക്കോ അവസരമുണ്ടാകില്ല.

എല്ലാ അപേക്ഷകളും ഫീസ് അടയ്ക്കലും ഓൺലൈനായി മാത്രമാണ് നടത്തേണ്ടത്. സമയപരിധിക്ക് ശേഷം ലഭിക്കുന്ന അപേക്ഷകൾ സ്വീകരിക്കില്ല.

English Summary:

CBSE has started the post-result process for Class 12 Supplementary Examination 2026. Students can apply for scanned copies of their evaluated answer books on August 31 and September 1, followed by mark verification and re-evaluation applications on September 7 and 8.