അധ്യാപക ജോലിയിലേക്ക് പ്രവേശിക്കാൻ ആഗ്രഹിക്കുന്നവർ ഏറെ പ്രാധാന്യത്തോടെ കാണുന്ന പരീക്ഷയാണ് സെൻട്രൽ ടീച്ചർ എലിജിബിലിറ്റി ടെസ്റ്റ് (CTET). കേന്ദ്ര വിദ്യാഭ്യാസ മന്ത്രാലയത്തിന്റെ ചുമതലയിൽ സെൻട്രൽ ബോർഡ് ഓഫ് സെക്കൻഡറി എജ്യുക്കേഷനാണ് (CBSE) പരീക്ഷ നടത്തുന്നത്. ഒന്നാം ക്ലാസ് മുതൽ എട്ടാം ക്ലാസ് വരെയുള്ള അധ്യാപക നിയമനത്തിനുള്ള യോഗ്യതാ മാനദണ്ഡങ്ങളിൽ പ്രധാനപ്പെട്ട ഒന്നാണ് സി.ടി.ഇ.ടി.

2026 സെപ്റ്റംബർ പരീക്ഷ

സി.ടി.ഇ.ടിയുടെ 22-ാം പതിപ്പാണ് 2026 സെപ്റ്റംബറിൽ നടത്തുന്നത്. നേരത്തെ സെപ്റ്റംബർ 6ന് പരീക്ഷ നടത്താനായിരുന്നു നിശ്ചയിച്ചിരുന്നത്. എന്നാൽ അപേക്ഷാ നടപടികൾ വീണ്ടും തുറന്ന സാഹചര്യത്തിൽ പരീക്ഷാ തീയതിയിൽ മാറ്റം വരുത്തി. ഓഗസ്റ്റ് 25 മുതൽ സെപ്റ്റംബർ 1 വരെ വീണ്ടും അപേക്ഷിക്കാൻ അവസരം നൽകിയിരുന്നു. സുപ്രീംകോടതി നിർദേശത്തിന്റെ പശ്ചാത്തലത്തിൽ നേരത്തെ അപേക്ഷിക്കാൻ കഴിയാതിരുന്ന അർഹരായ ഉദ്യോഗാർഥികൾക്ക് അവസരം നൽകുന്നതിനായിരുന്നു നടപടി. പുതുക്കിയ പരീക്ഷാ തീയതി അപേക്ഷാ പോർട്ടൽ അടച്ചതിന് ശേഷം പ്രഖ്യാപിക്കുമെന്ന് സി.ബി.എസ്.ഇ അറിയിച്ചിട്ടുണ്ട്.

ആർക്കൊക്കെ പരീക്ഷ എഴുതാം?

എൻ.സി.ടി.ഇ നിശ്ചയിച്ച അധ്യാപക യോഗ്യതാ മാനദണ്ഡങ്ങളും ബന്ധപ്പെട്ട സർക്കാർ, കെ.വി.എസ്., നവോദയ വിദ്യാലയ സമിതി എന്നിവയുടെ നിയമന ചട്ടങ്ങളും പാലിക്കുന്നവർക്ക് അപേക്ഷിക്കാം. യോഗ്യത സംബന്ധിച്ച അന്തിമ പരിശോധന നിയമന ഏജൻസിയാണ് നടത്തുക. സംവരണ വിഭാഗങ്ങളിൽപ്പെട്ടവർക്ക് നിശ്ചിത വ്യവസ്ഥകൾ പ്രകാരം വിദ്യാഭ്യാസ യോഗ്യതയിലെ മാർക്കിൽ അഞ്ചു ശതമാനം വരെ ഇളവുണ്ട്.

രണ്ട് പേപ്പറുകൾ

പേപ്പർ 1 ഒന്നാം ക്ലാസ് മുതൽ അഞ്ചാം ക്ലാസ് വരെ അധ്യാപകനാകാൻ ആഗ്രഹിക്കുന്നവർക്കുള്ളതാണ്. ശിശുവികാസവും അധ്യാപനശാസ്ത്രവും, ഗണിതം, പരിസ്ഥിതി പഠനം, ഭാഷ–1, ഭാഷ–2 എന്നിങ്ങനെ അഞ്ച് വിഭാഗങ്ങളിലായി 30 വീതം ചോദ്യങ്ങളുണ്ടാകും. ആകെ 150 ചോദ്യങ്ങൾ, 150 മാർക്ക്.

പേപ്പർ 2 ആറാം ക്ലാസ് മുതൽ എട്ടാം ക്ലാസ് വരെ അധ്യാപകനാകാൻ ആഗ്രഹിക്കുന്നവർക്കാണ്. ശിശുവികാസവും അധ്യാപനശാസ്ത്രവും, ഭാഷ–1, ഭാഷ–2 എന്നിവയ്ക്ക് പുറമെ ഗണിത-ശാസ്ത്രം അല്ലെങ്കിൽ സോഷ്യൽ സ്റ്റഡീസ്/സോഷ്യൽ സയൻസ് തിരഞ്ഞെടുക്കണം. ആകെ 150 ചോദ്യങ്ങളും 150 മാർക്കുമാണ്. രണ്ട് തലങ്ങളിലും അധ്യാപകനാകാൻ ഉദ്ദേശിക്കുന്നവർ രണ്ട് പേപ്പറുകളും എഴുതണം.

പരീക്ഷാരീതി

എല്ലാ ചോദ്യങ്ങളും ഒബ്ജക്ടീവ് മാതൃകയിലുള്ള എം.സി.ക്യു ചോദ്യങ്ങളാണ്. ഓരോ ചോദ്യത്തിനും ഒരു മാർക്ക് വീതം. നെഗറ്റീവ് മാർക്കില്ല. ഓരോ പേപ്പറിനും രണ്ടര മണിക്കൂറാണ് പരീക്ഷാസമയം. മലയാളം ഉൾപ്പെടെ വിവിധ ഭാഷകൾ ഭാഷാ പേപ്പറുകൾക്കായി തിരഞ്ഞെടുക്കാം.

എത്ര മാർക്ക് വേണം?

60 ശതമാനം മാർക്ക് നേടുന്നവരെ സി.ടി.ഇ.ടി യോഗ്യത നേടിയവരായി പരിഗണിക്കും. എന്നാൽ സി.ടി.ഇ.ടി പാസായാൽ നേരിട്ട് അധ്യാപക ജോലി ലഭിക്കില്ല. നിയമനത്തിനുള്ള മറ്റ് യോഗ്യതകളും തിരഞ്ഞെടുപ്പ് നടപടികളും പൂർത്തിയാക്കണം. കേന്ദ്ര സർക്കാർ സ്കൂളുകൾ, കെ.വി.എസ്., എൻ.വി.എസ്. തുടങ്ങിയ സ്ഥാപനങ്ങളിൽ സി.ടി.ഇ.ടി പ്രധാനമാണ്. സി.ബി.എസ്.ഇ അഫിലിയേറ്റഡ് സ്കൂളുകളിലും നിശ്ചിത അധ്യാപക നിയമനങ്ങൾക്ക് സി.ടി.ഇ.ടി/ടി.ഇ.ടി യോഗ്യത ആവശ്യമാണ്.

സർട്ടിഫിക്കറ്റിന് ആജീവനാന്ത സാധുത

സി.ടി.ഇ.ടി യോഗ്യതാ സർട്ടിഫിക്കറ്റിന് ആജീവനാന്ത സാധുതയുണ്ട്. യോഗ്യത നേടുന്നതിനായി എത്ര തവണ വേണമെങ്കിലും പരീക്ഷ എഴുതാം. യോഗ്യത നേടിയവർക്കും മാർക്ക് മെച്ചപ്പെടുത്തുന്നതിനായി വീണ്ടും പരീക്ഷയെഴുതാം.

പരീക്ഷാഫീസ്

ജനറൽ/ഒ.ബി.സി വിഭാഗങ്ങൾക്ക് ഒരു പേപ്പറിന് 1,000 രൂപയും രണ്ട് പേപ്പറുകൾക്ക് 1,200 രൂപയും ആണ് ഫീസ്. എസ്.സി/എസ്.ടി/ഭിന്നശേഷി വിഭാഗങ്ങൾക്ക് യഥാക്രമം 500 രൂപയും 600 രൂപയും. ബാങ്ക് നിരക്കനുസരിച്ചുള്ള ജി.എസ്.ടി അധികമായി ഈടാക്കും.

ഔദ്യോഗിക വെബ്സൈറ്റ്

അപേക്ഷ, അഡ്മിറ്റ് കാർഡ്, പരീക്ഷാ തീയതി, ഉത്തരസൂചിക, ഫലം തുടങ്ങിയ എല്ലാ ഔദ്യോഗിക അറിയിപ്പുകൾക്കും ctet.nic.in മാത്രം ആശ്രയിക്കണം. സെപ്റ്റംബർ 2026 പരീക്ഷയുടെ പുതുക്കിയ തീയതിയും അഡ്മിറ്റ് കാർഡ് സംബന്ധിച്ച വിവരങ്ങളും ഇതേ വെബ്സൈറ്റിലാണ് ലഭ്യമാകുക.

English Summary:

CTET is the national teacher eligibility examination conducted by CBSE for candidates aspiring to teach Classes I–VIII. The September 2026 session is the 22nd edition. The exam date, originally scheduled for September 6, has been revised after the application window was reopened from August 25 to September 1. Paper I is for Classes I–V and Paper II for Classes VI–VIII. Both papers have 150 MCQs for 150 marks, with no negative marking. The CTET qualifying certificate is valid for life. The official website is ctet.nic.in