തിരുവനന്തപുരം: പൊതുവിദ്യാഭ്യാസ വകുപ്പിന് കീഴിലെ അധ്യാപക തസ്തികകളിലേക്കുള്ള 18 പി.എസ്.സി റാങ്ക് പട്ടികകളുടെ കാലാവധി ആറുമാസം കൂടി നീട്ടാൻ മന്ത്രിസഭ തീരുമാനിച്ചു. പ്രൈമറി ടീച്ചർ മുതൽ ഹയർ സെക്കൻഡറി സ്കൂൾ ടീച്ചർ വരെയുള്ള തസ്തികകളുടെ റാങ്ക് പട്ടികകൾക്കാണ് ആനുകൂല്യം. 2026 സെപ്റ്റംബർ, ഒക്ടോബർ, നവംബർ മാസങ്ങളിൽ കാലാവധി അവസാനിക്കാനിരുന്ന പട്ടികകളാണ് നീട്ടിയത്.

ഒഴിവുകൾ യഥാസമയം പി.എസ്.സിക്ക് റിപ്പോർട്ട് ചെയ്യുന്നതിലുണ്ടായ കാലതാമസമാണ് റാങ്ക് പട്ടികകളുടെ കാലാവധി നീട്ടാനുള്ള പ്രധാന കാരണം. സെൻസസ്, ബി.എൽ.ഒ ചുമതലകൾ, അന്തർജില്ലാ സ്ഥലംമാറ്റ നടപടികൾ, സ്റ്റാഫ് ഫിക്‌സേഷൻ എന്നിവയിലെ കാലതാമസം മൂലം പല ഒഴിവുകളും സമയബന്ധിതമായി റിപ്പോർട്ട് ചെയ്യാൻ കഴിഞ്ഞിരുന്നില്ലെന്ന് മുഖ്യമന്ത്രി അറിയിച്ചു.

റാങ്ക് പട്ടികകളുടെ കാലാവധി നീട്ടുന്നത് നിയമനത്തിനായി കാത്തിരിക്കുന്ന ഉദ്യോഗാർഥികൾക്ക് ആശ്വാസമാകും. കാലാവധി അവസാനിക്കാനിരുന്ന പട്ടികകൾക്ക് ആറുമാസം കൂടി അവസരം ലഭിക്കുന്നതിനാൽ റിപ്പോർട്ട് ചെയ്യുന്ന ഒഴിവുകളിലേക്ക് നിലവിലെ പട്ടികയിൽനിന്ന് നിയമന നടപടികൾ തുടരാനാകും.

അതേസമയം, റാങ്ക് പട്ടികയുടെ കാലാവധി നീട്ടിയതുകൊണ്ട് എല്ലാ ഉദ്യോഗാർഥികൾക്കും നിയമനം ഉറപ്പാകില്ല. പി.എസ്.സിക്ക് റിപ്പോർട്ട് ചെയ്യുന്ന ഒഴിവുകളുടെ എണ്ണവും റാങ്കും സംവരണക്രമവും അനുസരിച്ചായിരിക്കും നിയമനം. സാധാരണയായി പി.എസ്.സി റാങ്ക് പട്ടികകൾ പുതിയ പട്ടിക പ്രസിദ്ധീകരിക്കുന്നതുവരെയോ പരമാവധി മൂന്ന് വർഷം വരെയോ നിബന്ധനകൾക്ക് വിധേയമായി പ്രാബല്യത്തിലുണ്ടാകും.

English Summary:

The Kerala Cabinet has decided to extend the validity of 18 PSC rank lists for teacher posts under the General Education Department by six months. The extension covers lists for posts ranging from Primary Teacher to Higher Secondary School Teacher that were due to expire in September, October and November 2026. Delays in reporting vacancies due to census and BLO duties, inter-district transfers and staff fixation were cited as the main reasons.