ബാങ്കിങ് മേഖലയിൽ ജോലി സ്വപ്നം കാണുന്ന ബിരുദധാരികൾക്ക് മികച്ച അവസരം. IBPS RRB Recruitment 2026ന്റെ ഭാഗമായി ഗ്രാമീണ ബാങ്കുകളിൽ 12,000ത്തിലധികം ഒഴിവുകൾ പ്രതീക്ഷിക്കുന്നു. ഓഫീസ് അസിസ്റ്റന്റ് (ക്ലർക്ക്), ഓഫീസർ സ്കെയിൽ-I, II, III തസ്തികകളിലേക്കാണ് നിയമനം.

IBPS ഇതുസംബന്ധിച്ച ലഘു വിജ്ഞാപനം പുറത്തിറക്കി. വിശദമായ വിജ്ഞാപനം ഉടൻ പ്രസിദ്ധീകരിക്കും. അപേക്ഷ സമർപ്പിക്കാനുള്ള അവസാന തീയതി സെപ്റ്റംബർ 21 എന്നാണ് നിലവിലെ അറിയിപ്പ്.

ഓഫീസ് അസിസ്റ്റന്റ്: ബിരുദം മതി

ഓഫീസ് അസിസ്റ്റന്റ് തസ്തികയിലേക്ക് 18 മുതൽ 28 വയസ്സ് വരെ പ്രായമുള്ളവർക്ക് അപേക്ഷിക്കാം. ഏതെങ്കിലും വിഷയത്തിൽ ബിരുദമാണ് അടിസ്ഥാന വിദ്യാഭ്യാസ യോഗ്യത. അപേക്ഷിക്കുന്ന സംസ്ഥാനത്തെ പ്രാദേശിക ഭാഷയിൽ പരിജ്ഞാനവും കംപ്യൂട്ടർ പരിജ്ഞാനവും ആവശ്യമാണ്. പ്രവൃത്തിപരിചയം ആവശ്യമില്ല.

ഓഫീസർ സ്കെയിൽ-I

സ്കെയിൽ-I ഓഫീസർ തസ്തികയിലേക്ക് 18 മുതൽ 30 വയസ്സ് വരെ പ്രായമുള്ളവർക്ക് അപേക്ഷിക്കാം. ഏതെങ്കിലും വിഷയത്തിലുള്ള ബിരുദമാണ് യോഗ്യത. അഗ്രികൾച്ചർ, ഐടി, ലോ, ഇക്കണോമിക്സ്, അക്കൗണ്ടൻസി തുടങ്ങിയ വിഷയങ്ങളിൽ ബിരുദമുള്ളവർക്ക് മുൻഗണന ലഭിക്കും. പ്രാദേശിക ഭാഷാ പരിജ്ഞാനം ആവശ്യമാണ്. പ്രവൃത്തിപരിചയം നിർബന്ധമല്ല.

സ്കെയിൽ-II, III തസ്തികകൾ

സ്കെയിൽ-II ഓഫീസർ തസ്തികയിലേക്ക് 21–32 വയസ്സ് വരെയുള്ളവർക്ക് അപേക്ഷിക്കാം. ജനറൽ ബാങ്കിങ് ഓഫീസർ തസ്തികയ്ക്ക് കുറഞ്ഞത് 50 ശതമാനം മാർക്കോടെ ബിരുദവും രണ്ട് വർഷത്തെ പ്രവൃത്തിപരിചയവും ആവശ്യമാണ്. ഐടി, ലോ, ഫിനാൻസ്, മാർക്കറ്റിങ് തുടങ്ങിയ സ്പെഷ്യലിസ്റ്റ് തസ്തികകൾക്ക് ബന്ധപ്പെട്ട പ്രൊഫഷണൽ യോഗ്യതയും പ്രവൃത്തിപരിചയവും വേണം.

സ്കെയിൽ-III ഓഫീസർ തസ്തികയിൽ 21–40 വയസ്സാണ് പ്രായപരിധി. കുറഞ്ഞത് 50 ശതമാനം മാർക്കോടെ ബിരുദവും ബാങ്കിങ്/ധനകാര്യ സ്ഥാപനത്തിൽ ഓഫീസറായി അഞ്ച് വർഷത്തെ പ്രവൃത്തിപരിചയവും ആവശ്യമാണ്.

തിരഞ്ഞെടുപ്പ് എങ്ങനെ?

ഓഫീസ് അസിസ്റ്റന്റ്: പ്രിലിമിനറി, മെയിൻ പരീക്ഷകൾ. ഇന്റർവ്യൂ ഇല്ല. മെയിൻ പരീക്ഷയിലെ പ്രകടനത്തിന്റെ അടിസ്ഥാനത്തിലാണ് തിരഞ്ഞെടുപ്പ്.

ഓഫീസർ സ്കെയിൽ-I: പ്രിലിമിനറി പരീക്ഷ, മെയിൻ പരീക്ഷ, തുടർന്ന് അഭിമുഖം.

സ്കെയിൽ-II, III: പ്രിലിമിനറി പരീക്ഷയില്ല. സിംഗിൾ ഓൺലൈൻ പരീക്ഷയ്ക്കും തുടർന്ന് അഭിമുഖത്തിനും വിധേയരാകണം.

പ്രധാന കുറിപ്പ്: ഒഴിവുകളുടെ കൃത്യമായ എണ്ണം, അപേക്ഷാ തീയതികൾ, ഫീസ്, പരീക്ഷാ തീയതികൾ, സംവരണം തുടങ്ങിയ വിശദാംശങ്ങൾ ഉൾപ്പെടുന്ന പൂർണ വിജ്ഞാപനം IBPS ഉടൻ പ്രസിദ്ധീകരിക്കും. ഔദ്യോഗിക വിജ്ഞാപനം പരിശോധിച്ച ശേഷം മാത്രം അപേക്ഷ നൽകുക.

Link: https://www.ibps.in/

English Summary

IBPS RRB Recruitment 2026 is expected to offer more than 12,000 vacancies in Regional Rural Banks for Office Assistant and Officer posts. Graduates can apply for Office Assistant and Scale-I Officer positions without prior work experience, while Scale-II and Scale-III posts require relevant experience. The detailed notification is expected soon, with September 21 reported as the application deadline.