ന്യൂഡൽഹി: രാജ്യത്തെ ഉന്നത വിദ്യാഭ്യാസ മേഖലയെ പുനഃസംഘടിപ്പിക്കുന്ന വിക്സിത് ഭാരത് ശിക്ഷാ അധിഷ്ഠാൻ (VBSA) ബിൽ, 2025 പരിശോധിക്കുന്ന സംയുക്ത പാർലമെന്ററി സമിതി (JPC) ബില്ലിലെ കേന്ദ്രവൽക്കരണ വ്യവസ്ഥകളിൽ നിയന്ത്രണം കൊണ്ടുവരാൻ ശുപാർശ. സംസ്ഥാനങ്ങളുമായും സർവകലാശാലകളുമായും നിർബന്ധിത കൂടിയാലോചന ഉറപ്പാക്കണമെന്നും, ഉന്നത വിദ്യാഭ്യാസ സ്ഥാപനങ്ങളുടെ സ്വയംഭരണം കൂടുതൽ ശക്തിപ്പെടുത്തണമെന്നും സമിതി നിർദേശിച്ചു.

ബിൽ നിലവിൽ വന്നാൽ യു.ജി.സി (UGC), എ.ഐ.സി.ടി.ഇ (AICTE), എൻ.സി.ടി.ഇ (NCTE) എന്നിവയെ ലയിപ്പിച്ച് ഏക ഉന്നത വിദ്യാഭ്യാസ നിയന്ത്രണ അതോറിറ്റിയായ വിക്സിത് ഭാരത് ശിക്ഷാ അധിഷ്ഠാൻ രൂപീകരിക്കാനാണ് കേന്ദ്ര സർക്കാർ ലക്ഷ്യമിടുന്നത്.

ബില്ലിലെ 47-ാം വകുപ്പ് കേന്ദ്രസർക്കാരിന് കമ്മിഷനെയോ കൗൺസിലുകളെയോ പിരിച്ചുവിടാനുള്ള അധികാരം നൽകുന്നുണ്ട്. എന്നാൽ, ഇത് അസാധാരണ സാഹചര്യങ്ങളിൽ മാത്രം, അവസാന മാർഗമായി, പരിമിത കാലത്തേക്ക് മാത്രമേ ഉപയോഗിക്കാവൂ എന്ന് ജെ.പി.സി ശുപാർശ ചെയ്തു. കൂടാതെ, സംസ്ഥാനങ്ങളുടെ അഭിപ്രായം തേടുന്നതും സർവകലാശാലകളുടെ പങ്കാളിത്തം ഉറപ്പാക്കുന്നതും നിയമത്തിൽ വ്യക്തമായി ഉൾപ്പെടുത്തണമെന്നും സമിതി ആവശ്യപ്പെട്ടു.

മൺസൂൺ സമ്മേളനത്തിൽ ബിൽ അവതരിപ്പിക്കുന്നതിന് മുമ്പ് ജെ.പി.സി റിപ്പോർട്ട് പാർലമെന്റിൽ സമർപ്പിക്കും.