തിരുവനന്തപുരം: സംസ്ഥാനത്തെ ഈ വര്‍ഷത്തെ അധ്യാപക അവാര്‍ഡുകള്‍ പ്രഖ്യാപിച്ചു. പി.ആര്‍. ചേംബറില്‍ നടന്ന വാര്‍ത്താസമ്മേളനത്തില്‍ പൊതുവിദ്യാഭ്യാസ മന്ത്രി എന്‍. ഷംസുദ്ദീന്‍ ആണ് അവാര്‍ഡുകള്‍ പ്രഖ്യാപിച്ചത്. ചരിത്രത്തിലാദ്യമായി വിദ്യാലയങ്ങള്‍ക്കായി ഏര്‍പ്പെടുത്തിയ ശ്രേഷ്ഠ വിദ്യാലയ പുരസ്‌കാരവും മന്ത്രി പ്രഖ്യാപിച്ചു.
വിദ്യാര്‍ത്ഥികളെ സര്‍ഗ്ഗാത്മകമായി വളര്‍ത്തിയെടുക്കുന്നതില്‍ അധ്യാപകരുടെ പങ്ക് വലുതാണെന്നും, കൂടുതല്‍ അര്‍പ്പണബോധത്തോടെ പ്രവര്‍ത്തിക്കുന്ന അധ്യാപകരെ കണ്ടെത്തി ആദരിക്കുകയാണ് അവാര്‍ഡിന്റെ ലക്ഷ്യമെന്നും മന്ത്രി പറഞ്ഞു. പൊതുവിദ്യാഭ്യാസ വകുപ്പ് സെക്രട്ടറി ഡോ. ഡി. സജിത് ബാബു, ഡയറക്ടര്‍ സ്‌നേഹില്‍ കുമാര്‍ സിങ് എന്നിവരുടെ സാന്നിധ്യത്തിലായിരുന്നു പ്രഖ്യാപനം.

എല്‍.പി, യു.പി, ഹൈസ്‌കൂള്‍, ഹയര്‍ സെക്കന്‍ഡറി വിഭാഗങ്ങളില്‍ അഞ്ച് വീതവും വൊക്കേഷണല്‍ ഹയര്‍ സെക്കന്‍ഡറി വിഭാഗത്തില്‍ മൂന്ന് അധ്യാപകരുമാണ് ഇത്തവണ പുരസ്‌കാരത്തിന് അര്‍ഹരായത്.
സംസ്ഥാന സര്‍ക്കാരിന്റെ നൂറുദിന കര്‍മ്മപരിപാടിയുടെ ഭാഗമായാണ് ഈ വര്‍ഷം മുതല്‍ വിദ്യാലയങ്ങള്‍ക്കായി 'ശ്രേഷ്ഠ വിദ്യാലയ പുരസ്‌കാരം' ഏര്‍പ്പെടുത്തിയതെന്ന് മന്ത്രി അറിയിച്ചു . പഠന നിലവാരം, പാഠ്യേതര പ്രവര്‍ത്തനങ്ങള്‍, അച്ചടക്കം, ഭൗതിക സാഹചര്യങ്ങള്‍ തുടങ്ങിയവ വിലയിരുത്തിയാണ് മികച്ച വിദ്യാലയങ്ങളെ തെരഞ്ഞെടുത്തത്. പ്രൈമറി, സെക്കന്‍ഡറി, ഹയര്‍ സെക്കന്‍ഡറി തലങ്ങളില്‍ മൂന്ന് വീതം സ്‌കൂളുകള്‍ക്കാണ് പുരസ്‌കാരം.

ശ്രേഷ്ഠ വിദ്യാലയ പുരസ്‌കാരത്തില്‍ ഒന്നാം സ്ഥാനത്തിന് അഞ്ച് ലക്ഷം രൂപയും രണ്ടാം സ്ഥാനത്തിന് മൂന്ന് ലക്ഷം രൂപയും മൂന്നാം സ്ഥാനത്തിന് ഒരു ലക്ഷം രൂപയുമാണ് സമ്മാനം.
അധ്യാപക ദിനമായ സെപ്റ്റംബര്‍ അഞ്ചിന് രാവിലെ 10.30ന് കോഴിക്കോട് കണ്ടംകുളം മുഹമ്മദ് അബ്ദുറഹ്മാന്‍ സ്മാരക ജൂബിലി ഹാളില്‍ നടക്കുന്ന പരിപാടിയില്‍ വച്ച് സംസ്ഥാനതല അധ്യാപക ദിനാചരണവും പുരസ്‌കാര വിതരണവും നടക്കും. പൊതുവിദ്യാഭ്യാസ വകുപ്പിന്റെ പുതിയ ഔദ്യോഗിക വെബ്‌സൈറ്റിന്റെ ഉദ്ഘാടനവും ചടങ്ങില്‍ നടക്കുമെന്ന് മന്ത്രി പറഞ്ഞു.

പുരസ്‌കാര ജേതാക്കള്‍

എല്‍.പി വിഭാഗം: അബ്ദുല്‍ അസീസ്.ഐ (ജി.എല്‍.പി.എസ് ചെങ്ങര, മലപ്പുറം), എം.ജി. ഗീതമ്മ (എം.ടി എല്‍.പി.എസ് കടമ്മനിട്ട, പത്തനംതിട്ട), ജോഷി.ഡി. കൊള്ളന്നൂര്‍ (കെ.ജി.എം.എല്‍.പി.എസ് അന്തിക്കാട്, തൃശ്ശൂര്‍), സൂസന്‍ കുരുവിള (സി.എം.എസ് എല്‍.പി.എസ് കീഴ്വായ്പ്പൂര്‍, പത്തനംതിട്ട), കണ്ണന്‍.എസ് (ഗവ. എല്‍.പി.എസ് പ്രാക്കുളം, കൊല്ലം).

യു.പി വിഭാഗം: ജനില്‍ ജോണ്‍ (സെന്റ് തെരേസിറ്റാസ് യു.പി.എസ് തലോര്‍, തൃശ്ശൂര്‍), അബ്ദുല്‍ അലി എം.സി (എ.യു.പി.എസ് തൃപ്പനച്ചി, മലപ്പുറം), ജോണ്‍സണ്‍ വി.ജെ (ജി.യു.പി.എസ് പുതിയങ്കം, ആലത്തൂര്‍, പാലക്കാട്), സിദ്ദിഖ് ഹസന്‍.എ (ഗവ. മോഡല്‍ യു.പി.എസ് നിലമ്പൂര്‍, മലപ്പുറം), ജെയിംസ്.വി (ലിറ്റില്‍ ഫ്‌ളവര്‍ യു.പി.എസ് വേനപ്പാറ, കോഴിക്കോട്).

ഹൈസ്‌കൂള്‍ വിഭാഗം: സുനില്‍ കുമാര്‍ കെ.പി (ജി.എച്ച്.എസ്.എസ് ഇരിക്കൂര്‍, കണ്ണൂര്‍), അലി അക്ബര്‍ വി.പി (ഐ.ഒ.എച്ച്.എസ്.എസ് എടവന്ന, മലപ്പുറം), വിനോദ് കുമാര്‍.കെ (മമ്പറം എച്ച്.എസ്.എസ് തലശ്ശേരി, കണ്ണൂര്‍), സിറാജുദ്ദീന്‍ പി.ടി (ജി.എച്ച്.എസ്.എസ് പൂനൂര്‍, മങ്ങാട്, കോഴിക്കോട്), രാജേഷ്.എം (കല്ലടി ഹൈസ്‌കൂള്‍ കുമരംപുത്തൂര്‍, മണ്ണാര്‍ക്കാട്, പാലക്കാട്).

ഹയര്‍ സെക്കന്‍ഡറി വിഭാഗം: ഡോ. ബിന്ദു പി. സുഭാഷ് (എസ്.എസ്.എച്ച്.എസ്.എസ് മൂര്‍ക്കനാട്, മലപ്പുറം), ഭാസ്‌കരന്‍.പി (ജി.എച്ച്.എസ്.എസ് കരിമ്പ, പാലക്കാട്), ബാബു മാത്യു (സി.എം.എസ്.എച്ച്.എസ്.എസ് മല്ലപ്പള്ളി, പത്തനംതിട്ട), ഡോ. ശ്രീജ കെ. (ജി.എച്ച്.എസ്.എസ് കുണ്ടൂപറമ്പ്, കോഴിക്കോട്), സുനില്‍ കുമാര്‍ കെ (ജി.എച്ച്.എസ്.എസ് കുളത്തൂപ്പുഴ, കൊല്ലം).

വൊക്കേഷണല്‍ ഹയര്‍ സെക്കന്‍ഡറി വിഭാഗം: ജിനേഷ്.എ (ഗവ. വി.എച്ച്.എസ്.എസ് ചേളാരി, തേഞ്ഞിപ്പാലം, മലപ്പുറം), സമീര്‍ സിദ്ദീഖി പി (ജി.വി.എച്ച്.എസ്.എസ് കാഞ്ഞങ്ങാട്, കാസര്‍ഗോഡ്), സതീഷ് റ്റി.വി (വി.എസ്.എം.എം ജി.വി.എച്ച്.എസ്.എസ് ഒല്ലൂര്‍, തൃശ്ശൂര്‍).

ശ്രേഷ്ഠ വിദ്യാലയ പുരസ്‌കാരം:

പ്രൈമറി വിഭാഗം: ഒന്നാം സ്ഥാനം ബീമാപള്ളി ജി.യു.പി.എസ്- തിരുവനന്തപുരം, രണ്ടാം സ്ഥാനം സെന്റ് ഫിലോമിനാസ് യു.പി.എസ് മല്ലപ്പള്ളി, പത്തനംതിട്ട; മൂന്നാം സ്ഥാനം നാഷണല്‍ എ.എല്‍.പി.എസ് വയനാട് എടവക.

സെക്കന്‍ഡറി വിഭാഗം: ഒന്നാം സ്ഥാനം ഗവ. ബോയ്‌സ് എച്ച്.എസ്.എസ് മഞ്ചേരി, മലപ്പുറം; രണ്ടാം സ്ഥാനം മൗണ്ട് കാര്‍മല്‍ എച്ച്.എസ്.എസ്, കോട്ടയം; മൂന്നാം സ്ഥാനം ജി.എച്ച്.എസ്.എസ് ചാവശ്ശേരി, ഇരിട്ടി, കണ്ണൂര്‍.

ഹയര്‍ സെക്കന്‍ഡറി വിഭാഗം: ഒന്നാം സ്ഥാനം ചക്കാലക്കല്‍ എച്ച്.എസ്.എസ് മടവൂര്‍, കോഴിക്കോട്; രണ്ടാം സ്ഥാനം ജി.എച്ച്.എസ്.എസ് കമ്പല്ലൂര്‍, കാസര്‍കോട്; മൂന്നാം സ്ഥാനം സെന്റ് ജോര്‍ജ് എച്ച്.എസ്.എസ് വാഴത്തോപ്പ്, ഇടുക്കി.