കേരള ഇൻസ്റ്റിറ്റ്യൂട്ട് ഓഫ് ടൂറിസം ആൻഡ് ട്രാവൽ സ്റ്റഡീസിന്റെ (KITTS) നേതൃത്വത്തിൽ ടൂറിസ്റ്റ് ഗൈഡ് പരിശീലന പരിപാടിയിലേക്ക് അപേക്ഷ ക്ഷണിച്ചു. കേരള ടൂറിസം വകുപ്പിന്റെ ആഭിമുഖ്യത്തിൽ തിരുവനന്തപുരത്തെ KITTS ആസ്ഥാനത്താണ് പരിശീലനം നടത്തുന്നത്. സ്റ്റേറ്റ് ലെവൽ ഗൈഡ്, ലോക്കൽ ലെവൽ ഗൈഡ് വിഭാഗങ്ങളിലായി ആകെ 168 സീറ്റുകളാണുള്ളത്. താൽപര്യമുള്ളവർക്ക് നവംബർ 9 വരെ ഓൺലൈനായി അപേക്ഷിക്കാം.

സ്റ്റേറ്റ് ലെവൽ ഗൈഡ്

ഒൻപത് ആഴ്ചയാണ് പരിശീലന കാലാവധി. ആകെ 27 സീറ്റുകളാണുള്ളത്. യു.ജി.സി അംഗീകൃത സർവകലാശാലയിൽനിന്ന് ഏതെങ്കിലും വിഷയത്തിൽ ബിരുദം നേടിയവർക്ക് അപേക്ഷിക്കാം. അല്ലെങ്കിൽ, അംഗീകൃത സർവകലാശാല, സ്ഥാപനം, സംഘടന, എംബസി, സാംസ്കാരിക കേന്ദ്രം എന്നിവിടങ്ങളിൽ വിദേശഭാഷയിൽ കുറഞ്ഞത് ആറുമാസത്തെ റെഗുലർ കോഴ്സ് പൂർത്തിയാക്കിയ പ്ലസ് ടു യോഗ്യതയുള്ളവർക്കും അപേക്ഷിക്കാം. ഇംഗ്ലീഷ് ഭാഷയിൽ പ്രാവീണ്യം നിർബന്ധമാണ്. 20 വയസ്സ് പൂർത്തിയായിരിക്കണം. ജി.എസ്.ടി ഉൾപ്പെടെ 32,745 രൂപയാണ് പരിശീലന ഫീസ്.

ലോക്കൽ ലെവൽ ഗൈഡ്

നാലാഴ്ചയാണ് പരിശീലന കാലാവധി. ആകെ 141 സീറ്റുകളുണ്ട്. പത്താം ക്ലാസ് വിജയമാണ് അടിസ്ഥാന യോഗ്യത. അപേക്ഷകർക്ക് 20 വയസ്സ് പൂർത്തിയായിരിക്കണം. ജി.എസ്.ടി ഉൾപ്പെടെ 20,355 രൂപയാണ് പരിശീലന ഫീസ്. അപേക്ഷകർ സ്വന്തം താമസജില്ലയിലെ ക്വാട്ടയിൽ മാത്രമേ അപേക്ഷിക്കാവൂ. മറ്റു ജില്ലകളിലെ ക്വാട്ടയിൽ സമർപ്പിക്കുന്ന അപേക്ഷകൾ നിരസിക്കും.

തിരഞ്ഞെടുപ്പ്

എഴുത്തുപരീക്ഷയുടെയും വ്യക്തിഗത അഭിമുഖത്തിന്റെയും അടിസ്ഥാനത്തിലാണ് തിരഞ്ഞെടുപ്പ്. സ്മാരകങ്ങൾ, ചരിത്രം, പൊതുവിജ്ഞാനം തുടങ്ങിയ വിഷയങ്ങളിൽനിന്ന് എഴുത്തുപരീക്ഷയിൽ ചോദ്യങ്ങളുണ്ടാകും. പരീക്ഷയിൽ 50 ശതമാനമോ അതിലധികമോ മാർക്ക് നേടുന്നവരെ മാത്രമേ അഭിമുഖത്തിന് പരിഗണിക്കൂ. മെറിറ്റ് അടിസ്ഥാനത്തിലായിരിക്കും അന്തിമ തിരഞ്ഞെടുപ്പ്.

എങ്ങനെ അപേക്ഷിക്കാം?

താൽപര്യമുള്ളവർ ഓൺലൈൻ അപേക്ഷാ പോർട്ടൽ വഴി അപേക്ഷ സമർപ്പിക്കണം. അപേക്ഷിക്കാനുള്ള അവസാന തീയതി നവംബർ 9.

വിജ്ഞാപനം: https://recruitopen.com/cmd/kitts1.html

English Summary

The Kerala Institute of Tourism and Travel Studies (KITTS), under the Kerala Tourism Department, has invited applications for tourist guide training at its headquarters in Thiruvananthapuram. A total of 168 seats are available across two categories: State-Level Guide (27 seats) and Local-Level Guide (141 seats). Applicants must be at least 20 years old. State-level training lasts nine weeks and costs ₹32,745, including GST. Local-level training lasts four weeks and costs ₹20,355, including GST.