തിരുവനന്തപുരം: കെ-ടെറ്റ് (K-TET) ഡിസംബർ 2025 പരീക്ഷ വിജയിച്ചവരുടെ അസൽ സർട്ടിഫിക്കറ്റ് പരിശോധനയുമായി ബന്ധപ്പെട്ട് പരീക്ഷാഭവൻ പുതിയ മാർഗനിർദേശങ്ങൾ പുറത്തിറക്കി. ജില്ലാവിദ്യാഭ്യാസ ഓഫീസർമാർക്കാണ് സർക്കുലർ നൽകിയത്.

നിയമന അംഗീകാരത്തോടെ നിലവിൽ സർവീസിലുള്ള അധ്യാപകർ നിലവിൽ ജോലി ചെയ്യുന്ന തസ്തികയ്ക്ക് ആവശ്യമായ കെ-ടെറ്റ് കാറ്റഗറി വിജയിച്ചിട്ടുണ്ടെങ്കിൽ, സർവീസ് ബുക്കിലെ രേഖകളുടെയോ ബന്ധപ്പെട്ട പേജുകളുടെ പ്രഥമാധ്യാപകൻ സാക്ഷ്യപ്പെടുത്തിയ പകർപ്പുകളുടെയോ അടിസ്ഥാനത്തിൽ സർട്ടിഫിക്കറ്റ് പരിശോധന പൂർത്തിയാക്കാമെന്ന് സർക്കുലറിൽ വ്യക്തമാക്കുന്നു.

കൂടാതെ, എസ്.എസ്.എൽ.സി സർട്ടിഫിക്കറ്റിൽ ജാതി, മതം, വിഭാഗം (Category) എന്നിവ രേഖപ്പെടുത്തിയിട്ടുണ്ടെങ്കിൽ അതിന്റെ അടിസ്ഥാനത്തിൽ പരിശോധന നടത്തണം. അത്തരം സാഹചര്യങ്ങളിൽ പ്രത്യേകം ജാതി സർട്ടിഫിക്കറ്റോ നോൺ-ക്രീമിലെയർ സർട്ടിഫിക്കറ്റോ ഹാജരാക്കാൻ നിർദേശിക്കരുതെന്നും വ്യക്തമാക്കിയിട്ടുണ്ട്.

എന്നാൽ എസ്.എസ്.എൽ.സി സർട്ടിഫിക്കറ്റിൽ ഈ വിവരങ്ങൾ രേഖപ്പെടുത്തിയിട്ടില്ലെങ്കിൽ മാത്രമേ ജാതി സർട്ടിഫിക്കറ്റും നോൺ-ക്രീമിലെയർ സർട്ടിഫിക്കറ്റും ഹാജരാക്കാൻ ആവശ്യപ്പെടാവൂ എന്നും പരീക്ഷാഭവൻ നിർദേശിച്ചു.