ന്യൂഡൽഹി: രാജ്യത്തെ പ്രമുഖ കേന്ദ്ര സർവകലാശാലകളിലൊന്നായ ഡൽഹി സർവകലാശാലയുടെ (DU) 2026-27 അധ്യയന വർഷത്തെ ബിരുദ പ്രവേശനത്തിന് കോമൺ സീറ്റ് അലോക്കേഷൻ സിസ്റ്റം (CSAS-UG) വഴി 1.9 ലക്ഷത്തിലധികം വിദ്യാർഥികൾ രജിസ്റ്റർ ചെയ്തതായി സർവകലാശാല . ഇവരിൽ 1.64 ലക്ഷത്തിലധികം പേർ കോഴ്സുകളുടെയും കോളേജുകളുടെയും മുൻഗണന ക്രമം രേഖപ്പെടുത്തുന്ന രണ്ടാംഘട്ട നടപടികളും പൂർത്തിയാക്കിയിട്ടുണ്ട്.

ഈ വർഷം ഡൽഹി സർവകലാശാലയ്ക്ക് കീഴിലുള്ള വിവിധ കോളേജുകളിലായി 71,624 ബിരുദ സീറ്റുകളാണ് ലഭ്യമാക്കിയിരിക്കുന്നത്. ഒന്നാംഘട്ട സീറ്റ് അലോട്ട്മെന്റ് പട്ടിക ജൂലൈ 16 വൈകിട്ട് 5 മണിക്ക് പ്രസിദ്ധീകരിക്കും. സീറ്റ് ലഭിക്കുന്ന വിദ്യാർഥികൾ നിശ്ചിത സമയത്തിനകം അത് അംഗീകരിച്ച് രേഖാ പരിശോധനയും ഫീസ് അടയ്ക്കലും പൂർത്തിയാക്കണം.

പ്രവേശന നടപടികൾ CUET-UG 2026 സ്കോറിന്റെ അടിസ്ഥാനത്തിലാണ് നടക്കുന്നത്. CSAS പോർട്ടലിൽ വിദ്യാർഥികൾ തങ്ങൾ ആഗ്രഹിക്കുന്ന കോഴ്സുകളും കോളേജുകളും മുൻഗണനാക്രമത്തിൽ നൽകിയ ശേഷമാണ് അലോട്ട്മെന്റ് തയ്യാറാക്കുന്നത്. രജിസ്ട്രേഷനും മുൻഗണനാ ക്രമീകരണവും പൂർത്തിയാക്കാനുള്ള അവസാന തീയതി ജൂലൈ 11 രാത്രി 11.59 വരെയാണ്.

ദേശീയതലത്തിൽ ഏറ്റവും കൂടുതൽ വിദ്യാർഥികൾ തിരഞ്ഞെടുക്കുന്ന കേന്ദ്ര സർവകലാശാലകളിലൊന്നായ ഡൽഹി സർവകലാശാലയിൽ എല്ലാ വർഷവും ലഭ്യമായ സീറ്റുകളെക്കാൾ നിരവധി മടങ്ങ് അപേക്ഷകളാണ് ലഭിക്കുന്നത്. അതുകൊണ്ടുതന്നെ ഉയർന്ന CUET സ്കോർ നേടുന്നവർക്കാണ് പ്രമുഖ കോളേജുകളിലും ജനപ്രിയ കോഴ്സുകളിലും പ്രവേശന സാധ്യത കൂടുതലുള്ളത്.