തിരുവനന്തപുരം: കേന്ദ്ര കോർപ്പറേറ്റ് കാര്യ മന്ത്രാലയത്തിന്റെ നേതൃത്വത്തിൽ നടപ്പാക്കുന്ന പ്രധാനമന്ത്രി ഇന്റേൺഷിപ്പ് സ്കീം (PMIS)-ലേക്ക് അപേക്ഷ ക്ഷണിച്ചു. അക്കാദമിക പഠനവും വ്യവസായ രംഗത്തെ തൊഴിൽപരിചയവും തമ്മിലുള്ള അന്തരം കുറയ്ക്കുക എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്.

പദ്ധതിയിലൂടെ യുവാക്കൾക്ക് 6 അല്ലെങ്കിൽ 9 മാസത്തെ ഇന്റേൺഷിപ്പ് ലഭിക്കും. പ്രതിമാസം 9,000 രൂപ സാമ്പത്തിക സഹായവും, 6,000 രൂപയുടെ ഒറ്റത്തവണ ഇൻസിഡന്റൽ ഗ്രാന്റും ലഭിക്കും. കൂടാതെ സൗജന്യ ലൈഫ്, വ്യക്തിഗത അപകട ഇൻഷുറൻസ് പരിരക്ഷയും ഇന്റേൺഷിപ്പ് പൂർത്തിയാക്കിയതിന് ഔദ്യോഗിക സർട്ടിഫിക്കറ്റും നൽകും.

18 മുതൽ 25 വയസ്സ് വരെയുള്ള ഇന്ത്യൻ പൗരന്മാർക്കാണ് അപേക്ഷിക്കാനാവുക. നിലവിൽ പൂർണസമയ ജോലി ചെയ്യാത്തവർ, പത്താം ക്ലാസ്, പ്ലസ് ടു, ഐ.ടി.ഐ., ഡിപ്ലോമ, ബിരുദം, ബിരുദാനന്തര ബിരുദം പഠിക്കുന്നവരും അവസാനവർഷ വിദ്യാർഥികളും, ഓൺലൈൻ, ഡിസ്റ്റൻസ് വിദ്യാഭ്യാസം തുടരുന്നവരും അപേക്ഷിക്കാൻ അർഹരാണ്.

അതേസമയം, ഐ.ഐ.ടി., ഐ.ഐ.എം., എൻ.എൽ.യു., ഐ.ഐ.എസ്.സി. തുടങ്ങിയ സ്ഥാപനങ്ങളിലെ ബിരുദധാരികൾ, സി.എ., സി.എം.എ., സി.എസ്., എം.ബി.എ., എം.ബി.ബി.എസ്., പി.എച്ച്.ഡി. ഉൾപ്പെടെയുള്ള പ്രൊഫഷണൽ യോഗ്യതയുള്ളവർ, NATS/NAPS പരിശീലനം നേടിയവർ, വാർഷിക കുടുംബവരുമാനം 12 ലക്ഷം രൂപയിൽ കൂടുതലുള്ളവർ, കുടുംബത്തിൽ സ്ഥിരം സർക്കാർ ജീവനക്കാരുള്ളവർ എന്നിവർക്ക് പദ്ധതിയിൽ അർഹതയില്ല.

താൽപര്യമുള്ളവർ pminternship.mca.gov.in പോർട്ടൽ വഴി e-KYC പൂർത്തിയാക്കി ഓൺലൈനായി അപേക്ഷിക്കണം.