കൊല്ലം: ശ്രീനാരായണഗുരു ഓപ്പൺ യൂണിവേഴ്സിറ്റിയുടെ 2026-27 അധ്യയന വർഷത്തെ വിവിധ ബിരുദ, ബിരുദാനന്തര ബിരുദ കോഴ്സുകളിലേക്കുള്ള പ്രവേശനത്തിനുള്ള അപേക്ഷാ തീയതി സെപ്റ്റംബർ 15 വരെ നീട്ടി. ഓപ്പൺ ആൻഡ് ഡിസ്റ്റൻസ് ലേണിങ് രീതിയിൽ 30 യു.ജി-പി.ജി പ്രോഗ്രാമുകളിലേക്കാണ് അപേക്ഷ ക്ഷണിച്ചിരിക്കുന്നത്.

ഡ്യുവൽ ഡിഗ്രി സൗകര്യവും സർവകലാശാല ഒരുക്കിയിട്ടുണ്ട്. സംസ്ഥാന സാക്ഷരതാ മിഷന്റെ സഹകരണത്തോടെ എല്ലാ ജില്ലകളിലും പ്രവേശന സഹായ ഡെസ്കുകളും സജ്ജീകരിച്ചിട്ടുണ്ട്.

വിദ്യാർഥികൾക്ക് www.sgou.ac.in അല്ലെങ്കിൽ erp.sgou.ac.in പോർട്ടലുകൾ വഴി ഫീസ് അടച്ച് രജിസ്റ്റർ ചെയ്യാം. അഞ്ച് റീജണൽ സെന്ററുകളുടെ പരിധിയിലായി കേരളത്തിലുടനീളം 75 പഠനകേന്ദ്രങ്ങളാണ് പഠിതാക്കൾക്കായി പ്രവർത്തിക്കുന്നത്.

പ്രായപരിധിയില്ല; ടി.സി നിർബന്ധമല്ല

പ്രായപരിധിയോ മാർക്ക് മാനദണ്ഡമോ ഇല്ലാതെ പ്രവേശനം നേടാമെന്നതാണ് ഓപ്പൺ യൂണിവേഴ്സിറ്റിയുടെ പ്രധാന പ്രത്യേകത. അഡ്മിഷന് ട്രാൻസ്ഫർ സർട്ടിഫിക്കറ്റ് (ടി.സി) നിർബന്ധമല്ല. സർക്കാർ ജീവനക്കാർ ഉൾപ്പെടെ വിവിധ തൊഴിൽ മേഖലകളിൽ ജോലി ചെയ്യുന്നവർക്ക് സൗകര്യപ്രദമായ രീതിയിലാണ് പഠനക്രമം ഒരുക്കിയിരിക്കുന്നത്.

പ്ലസ് ടു, പ്രീ-ഡിഗ്രി അല്ലെങ്കിൽ സർക്കാർ അംഗീകൃത രണ്ടോ മൂന്നോ വർഷ ഡിപ്ലോമയാണ് ബിരുദ പ്രവേശനത്തിനുള്ള അടിസ്ഥാന യോഗ്യത. ഡിഗ്രി ഏത് വിഷയത്തിലായാലും ഇഷ്ടമുള്ള വിഷയത്തിൽ ബിരുദാനന്തര ബിരുദത്തിന് അപേക്ഷിക്കാനും അവസരമുണ്ട്.

യു.ജി.സി നിർദേശപ്രകാരം പ്രവേശനത്തിന് മുമ്പ് എല്ലാ വിദ്യാർഥികളും നിർബന്ധമായും ABC-ID, DEB-ID എന്നിവ നേടണം. പ്രോഗ്രാം ഫീസ്, യോഗ്യത, റീജണൽ സെന്ററുകൾ, ലേണർ സപ്പോർട്ട് സെന്ററുകൾ എന്നിവ സംബന്ധിച്ച വിശദാംശങ്ങൾ സർവകലാശാലയുടെ പ്രോസ്പെക്ടസിൽ ലഭിക്കും.

ശ്രീനാരായണഗുരു ഓപ്പൺ യൂണിവേഴ്സിറ്റിയുടെ യു.ജി, പി.ജി പ്രോഗ്രാമുകൾ യു.ജി.സി/ഡി.ഇ.ബി അംഗീകാരത്തോടെയാണ് നടത്തുന്നത്. സർവകലാശാലയുടെ ഡിഗ്രികൾ ഉയർന്ന പഠനത്തിനും തൊഴിൽ ആവശ്യങ്ങൾക്കും മറ്റ് സർവകലാശാലകളുടെ ബിരുദങ്ങൾക്ക് സമാനമായി അംഗീകരിക്കപ്പെടുന്നതായും അധികൃതർ അറിയിച്ചു.

സഹായത്തിന്: 9188909901, 9188909902
സാങ്കേതിക സഹായം: 9188909903
കൂടുതൽ വിവരങ്ങൾക്ക്: 0474 2966841

English Summary

Sree Narayana Guru Open University has extended the application deadline for its 2026-27 admissions to September 15. Applications are open for 30 undergraduate and postgraduate programmes offered through Open and Distance Learning mode. There is no age limit or minimum mark requirement, and Transfer Certificate is not mandatory. The flexible learning system is particularly beneficial for working professionals. Eligible candidates can apply through the university website after obtaining ABC-ID and DEB-ID.