യുണൈറ്റഡ് നേഷൻസ് (യുഎൻ) സെക്രട്ടേറിയറ്റിൽ ജോലി നേടാൻ യുവ പ്രൊഫഷണലുകൾക്ക് അവസരമൊരുക്കുന്ന യങ് പ്രൊഫഷണൽസ് പ്രോഗ്രാം (YPP) 2026-ലേക്ക് അപേക്ഷ ക്ഷണിച്ചു. ഡെവലപ്മെന്റ് ആൻഡ് സസ്റ്റെയ്നബിലിറ്റി വിഷയത്തിലുള്ള മത്സരപരീക്ഷയ്ക്കാണ് അപേക്ഷ ക്ഷണിച്ചിരിക്കുന്നത്. യുഎന്നിന്റെ ഔദ്യോഗിക റിക്രൂട്ട്മെന്റ് പോർട്ടലായ ഇൻസ്‌പൈർ (Inspira) വഴി അപേക്ഷിക്കാം. 2026 നവംബർ 30 ആണ് അവസാന തീയതി.

യോഗ്യരായ ഉദ്യോഗാർഥികളെ യുഎൻ സെക്രട്ടേറിയറ്റിലേക്ക് തിരഞ്ഞെടുക്കുന്നതിനുള്ള മത്സരപരീക്ഷയാണിത്. പരീക്ഷയും തുടർന്നുള്ള തിരഞ്ഞെടുപ്പ് ഘട്ടങ്ങളും വിജയകരമായി പൂർത്തിയാക്കുന്നവരെ മൂന്ന് വർഷത്തേക്ക് സാധുതയുള്ള റോസ്റ്ററിൽ ഉൾപ്പെടുത്തും. എന്നാൽ റോസ്റ്ററിൽ ഇടംനേടുന്നതുകൊണ്ടുമാത്രം ജോലി ഉറപ്പാകില്ല. ഒഴിവുകളുടെയും സംഘടനയുടെ ആവശ്യങ്ങളുടെയും അടിസ്ഥാനത്തിലായിരിക്കും നിയമനം.

യോഗ്യതകൾ

2026-ലെ YPP പരീക്ഷയിൽ പങ്കെടുക്കാൻ അനുമതിയുള്ള രാജ്യങ്ങളിലെ പൗരന്മാർക്കാണ് അപേക്ഷിക്കാനാകുക. അപേക്ഷകർക്ക് 32 വയസോ അതിൽ താഴെയോ ആയിരിക്കണം. ഇംഗ്ലീഷ് അല്ലെങ്കിൽ ഫ്രഞ്ച് ഭാഷയിൽ പ്രാവീണ്യവും ആവശ്യമാണ്. പങ്കെടുക്കാൻ അർഹതയുള്ള രാജ്യങ്ങളുടെ പട്ടികയും മറ്റ് നിബന്ധനകളും യുഎൻ കരിയേഴ്‌സ് വെബ്സൈറ്റിൽ പരിശോധിക്കാം.

വിദ്യാഭ്യാസ യോഗ്യത

ഡെവലപ്മെന്റ് ആൻഡ് സസ്റ്റെയ്നബിലിറ്റിയുമായി ബന്ധപ്പെട്ട വിഷയങ്ങളിൽ കുറഞ്ഞത് മൂന്ന് വർഷത്തെ പഠനം പൂർത്തിയാക്കിയ ബിരുദമോ തത്തുല്യ യോഗ്യതയോ ഉള്ളവർക്ക് അപേക്ഷിക്കാം.

ഇക്കണോമിക്സ്, സ്റ്റാറ്റിസ്റ്റിക്സ്, ഡാറ്റാ സയൻസ്, സോഷ്യൽ അഫയേഴ്സ്, പരിസ്ഥിതി സംരക്ഷണം, സുസ്ഥിര വികസനം എന്നിവയാണ് പ്രധാന വിഷയങ്ങൾ. കൃഷി, വനം, മത്സ്യബന്ധനം, ബിസിനസ് ആൻഡ് അഡ്മിനിസ്ട്രേഷൻ, കംപ്യൂട്ടിങ്, ഹ്യുമാനിറ്റീസ്, നിയമം, ഗണിതം തുടങ്ങിയ അനുബന്ധ മേഖലകളിലെ ബിരുദധാരികൾക്കും അപേക്ഷിക്കാം.

അപേക്ഷാ സംവിധാനത്തിൽ സ്വന്തം യോഗ്യതയുടെ പേര് കൃത്യമായി ലഭ്യമല്ലെങ്കിൽ ഏറ്റവും അനുയോജ്യമായ വിഷയം തെരഞ്ഞെടുത്ത് കമന്റ് ബോക്സിൽ വിശദീകരിക്കാം.

പ്രവൃത്തിപരിചയം നിർബന്ധമില്ല

അപേക്ഷിക്കാൻ മുൻപരിചയം നിർബന്ധമില്ല. എന്നാൽ ഒരു രാജ്യത്തുനിന്ന് ഒരേ വിഷയത്തിലേക്ക് 90-ലധികം അപേക്ഷകൾ ലഭിക്കുന്ന സാഹചര്യത്തിൽ ഉദ്യോഗാർഥികളെ ചുരുക്കപ്പട്ടികയിൽ ഉൾപ്പെടുത്തുന്നതിനുള്ള പരിശോധനയിൽ പ്രവൃത്തിപരിചയം അധിക യോഗ്യതയായി പരിഗണിച്ചേക്കാം.

യുഎൻ ഡിപ്പാർട്ട്മെന്റ് ഓഫ് ഇക്കണോമിക് ആൻഡ് സോഷ്യൽ അഫയേഴ്സ്, യുണൈറ്റഡ് നേഷൻസ് കോൺഫറൻസ് ഓൺ ട്രേഡ് ആൻഡ് ഡെവലപ്മെന്റ് (UNCTAD), വിവിധ പ്രാദേശിക കമ്മീഷനുകൾ തുടങ്ങിയ വിഭാഗങ്ങളിലാണ് പ്രധാനമായും നിയമനസാധ്യതയുള്ളത്.

താൽപര്യമുള്ളവർ യോഗ്യതയും രാജ്യാടിസ്ഥാനത്തിലുള്ള നിബന്ധനകളും പരിശോധിച്ച് അവസാന തീയതിയായ നവംബർ 30-നകം അപേക്ഷ സമർപ്പിക്കണം.

English Summary

The United Nations has invited applications for the 2026 Young Professionals Programme (YPP) examination in Development and Sustainability. Eligible candidates must be nationals of participating countries, aged 32 or below, and proficient in English or French. Applicants need a bachelor's degree or equivalent qualification involving at least three years of study in a relevant or related field.